چاودێرانی سیاسی ئاماژە دەكەن كە یەكێتی هەرچی بكات ناتوانێت 16ی ئۆكتۆبەر و رابردووە تاڵەكەی لە بیری خەڵكی كەركووك بباتەوە، كە حەوت ساڵە كەركووك لە دۆخێكی خراپدایە و كوردی شارەكە رووبەڕووی دۆخێكی خراپ بوونەتەوە و هیچ حیسابێكیان بۆ ناكرێت، بگرە بە شێوازی جۆراوجۆر مافیان دەخورێت، ئێستەشی لەگەڵدا بێت كەركووك لە لایەن یەكێتییەوە هەرزانفرۆش دەكرێت و كورد بە هەموو شێوەیەك لەو پارێزگایە لە كەمیدایە و ئەوەی پۆست و پلە و شوێنە گرنگ و هەستیارەكان بێت رادەستی عەرەب كراوە.
رێبوار كەلاری، چاودێری سیاسی بە “وشە”ی راگەیاند، یەكێتی هۆكاری ئەو دۆخە بوو كە بەسەر كەركووك و كەركووكییەكاندا هات، هەرچی بكات ناتوانێت ئەوە لە بیری خەڵك بباتەوە كە چۆن كەركوكییەكانی بەو رۆژە گەیاند و چۆن بووە هۆكاری نەمانی دەسەڵاتی كوردی لە شارەكە؟، ئێستەش لەگەڵ عەرەب رێككەوتنی كردووە، بۆیە ئەوان كەركووكییان بەو رۆژە گەیاند و هیچ كات جێی متمانە نین.
روونی كردەوە، یەكێتی باجی ئەو هەڵەیە دەدات كە كردی، هەرچی رووی دا لە ماوەی ئەو حەوت ساڵەدا و ئەوەشی ئێستە روودەدات لە ئەنجامی 16ی ئۆكتۆبەرە، كەركووك و كەركووكییەكان هیچ تاوانێكیان نییە ئەوەیان بەرانبەر كرا، ئەوەی یەكێتی كردی رادەستكردنی كەركووك بوو بە هەموو شێوەیەك بۆ عەرەب، ئێستەش ناوەناوە فرمێسكی تیمساحانە دەسڕێت و خۆی بە خەمخۆر و دڵسۆزی كەركووكییەكان دەزانێت، لەبارەی 16ی ئۆكتۆبەرەوە هەر ئەوەندە بەسە بڵێین كە كەركووك لە كوێوە گەیشتە كوێ و چی لێ هات؟، دەسەڵاتی ئیداری و تەناهیی شارەكە لە كوێوە گەیشتە كوێ؟
لای خۆیەوە عەبدوڵا سەعید، رۆشنبیرێكی كەركووك بە “وشە”ی گوت، یەكێتی هیچكات كاری بۆ پارێزگاریكردن لە تێكنەچوونی پێوەندیی لایەنە كوردییەكان نەكردووە، كاری بۆ یەكڕیزیی نێوماڵی كورد و بۆ بەرژەوەندیی نەتەوە و نیشتمان نەكردووە، یەكێتی یەك شتی بینیوە ئەویش پۆست و پلەیە.
ئاماژەی كرد، ئەو درزەی لە نێو لایەنەكان هەیە، هۆكارەكەی ئەو تاكڕەوییەی یەكێتییە كە بەو جۆرە كار دەكات، كاری بۆ پاراستنی دەستكەوتەكان نەكردووە و هۆكاری خراپیی دۆخی هەرێمی كوردستانە، چونكە بەرژەوەندییەكانی خۆی بەدەست نەهاتوون ئەی حزب بۆچی دروست بووە و خەڵك دەنگی پێ داوە، ئەمە حاڵی یەكێتییە بۆیە هەمیشە لەكێشەدایە، لە كەركووك لە 16ی ئۆكتۆبەر بە جۆرێك رابردوویەكی تاڵی دروست كرد كە تا ماوە ناتوانێت بیسڕێتەوە.
پێوەست بە بابەتەكە جەمال عەزیز، كادری پارتی لە كەركووك بۆ “وشە” ئاماژە دەكات، یەكێتی سیاسەتێكی هەرزەییانەی هەیە كە چەندان ساڵە بەو شێوەیە پێڕەوی دەكات، ئەمەی یەكێتی دەیكات لە چوارچێوەی سیاسەت نییە، بگرە وەك شتێكی لێ هاتووە كە حزب راكەڕاكیەتی بەدوای پۆستدا، راستییەكەی حزب لەسەر ئەو بنەمایە دروست نابێت و متمانەی نابێت، ئەگەر حزب لە پاڵ هەر پرسێكی نیشتمانی یان نەتەوەیی و بگرە سیاسیش، هەوڵی پاراستنی بەرژەوەندییەكانی خۆی بدات، تا ئاستێك ئاساییە، بەڵام حزبێك بچێتە هەر گفتوگۆ و دانیشتنێك و ئامانجی تەنیا ئەوە بێت بڵێ دەبێت ئەوە بكرێت و ئاوا بكرێت و ئەمە بكرێت، داواكاریی خۆی پێشكەش بكات و بچێتە دەرەوە و بیری لای پۆستەكانی خۆی بێت.
ئەو كادرەی پارتی دووپاتی كردەوە، لە كەركووك كە بە خوێن بە دەست هاتبوو، هەموو جومگە و پۆست و پلەكان و بەرپرسەكانی پۆستەكان كورد بوون، لە سایەتی یەكێتی و 16ی ئۆكتۆبەر و دەستتێكەڵكردن لەگەڵ عەرەب هەموویان دران بە عەرەب و كورد هچی لە دەست نەماوە، دیموگرافیای كەركووكیش مەترسیی لەسەرە، هەمووی لە ئەنجامی ئەوەی یەكێتی بەسەر كەركووكی هێنا.